Siri Za Kuwa Mjasiriamali Bora Na Kufikia Mafanikio Makubwa.
Wajasiriamali wengi wamekuwa wakijishughulisha shughuli za uzalishaji kama kutoa huduma au kuuza bidhaa na lengo likiwa kupata mafanikio. Katika kufikia mafanikio makubwa wachache wameweza na wengi wao kutofikia au kukua kwa taratibu. Ili uweze kufikia mafanikio makubwa katika ujasiriamali kuna vitu ambavyo unatakiwa kuvifahamu na kuthubutu kuvifanya ili kupata mafanikio makubwa. Mambo ambayo yana tija kubwa ni mambo madogo madogo ila yana mchango mkubwa sana katika kufikia mafanikio makubwa.
Hizi ndio siri za mjasiriamali bora ambazo zitapelekea kufikia mafanikio makubwa
Kupenda kitu ambacho unakifanya
Kama unatoa huduma au kuuza bidhaa ni muhimu kuipenda na kuithamini huduma ambayo unaitoa ili uweze kuifanya kwa ubora na kukidhi mahitaji ya wateja wako. Ukipenda kitu ambacho unafanya ni rahisi kukifanya bila kuchoka hata kama unakutana na changamoto kwa kiasi gani. Ukipenda huduma unayoitoa utawapenda wateja wako na kuweza kutoa huduma bora.
SOMA; Wajasiriamali Wenye Mafanikio Hufanya Mambo Haya Matano Kila Siku.
Kuwa mvumilivu na kutokata tamaa
Hakuna jambo ambalo unaweza kulifanya kwa urahisi katika dunia ya leo ambayo imejaa changamoto nyingi na kukatishwa tamaa. Ukiwa mjasiriamali unatakiwa kuwa mvumilivu hasa pale mambo yanapokwenda tofauti na mategemeo yako. Ukiwa katika ujasiriamali kuna kipindi unakutana changamoto nyingi ambazo usipokuwa makini unaweza kata tamaa ila changamoto hizi zinapima uwezo wako wa ustahimilivu na kupambana na changamoto. Ukiwa umefanikiwa kutatua changamoto hiyo ndivyo ambavyo utapiga hatua na kufikia mafanikio makubwa.
Kuwa na nidhamu ya pesa
Kama unahitaji kuwa mjasiriamali ambaye anakua kila siku nidhamu ya pesa ni muhimu sana katika msingi wa kukuza biashara yako. Matumizi yako yasizidi au yasiathiri ukuaji wa biashara yako. Ili uweze kukuza biashara yako ukawa na matumizi ya kiasi ambayo yatakuwa rafiki wa ukuaji wa biashara yako. Ili uweze kujua kama biashara yako inakua ni vizuri ukawa na kumbukumbu ya biashara yako kuhusu matumizi na mapato.
SOMA; Unapokuwa Tayari Kuingia Kwenye Ujasiriamali Fanya Vitu Hivi Vitano.
Kuanza kufanya biashara hata kwa mtaji mdogo
Watu wengi hasa wenye elimu hupenda kuanza kufanya biashara kwa mtaji mkubwa na kuona tatizo kubwa ambalo linafanya washindwe kujiajiri na kwa kutokuwa na mtaji wa kutosha. Kuna faida kubwa ya kuanza kuifanya biashara kwa mtaji mdogo huku ukiendelea kukua kwa taratibu faida hizo ni a) Unapata uwezo kusimamia biashara kwa madaraja yaani kuanzia chini b) Unapata uwezo wa kuzisimamia pesa c) Unapata uwezo mkubwa wa kupambana na changamoto
Kufanya kazi kwa Bidii na Ubunifu
Hakuna kitu ambacho unaweza fikia mafanikio makubwa kama hautofanya kazi kwa bidii. Unaweza kuwa na mtaji mkubwa kama hufanyi kazi kwa bidii na kwa ubunifu ni kazi bure. Mafanikio makubwa yanahitaji kujitoa na kufanya kazi kuliko ambavyo ulikuwa unafanya kazi mwanzo na ikiwezekana fanya kazi zaidi ya masaa ambayo ulikuwa unafanya mwanzo.
Huduma au bidhaa yako ilenge kuisaidia jamii
Ukitoa huduma ambayo itasaidia kutatua matatizo ya jamii husika ni rahisi kwako kuweza kuliteka soko na kuuza bidhaa yako au huduma katika kiwango cha juu. Kama huduma yako itatua tatizo katika jamii ni rahisi kupata wateja wengi na wewe mjasiriamali kuweza kufikia mafanikio makubwa. Biashara nyingi ambazo zimelenga kutatua matatizo ya jamii zinafanya vizuri katika soko na kuwa na ushindani mdogo kuliko bishara za kuiga toka kwa wengine.
SOMA; Huyu Ni Mjasiriamali Mwenye Hamasa Kubwa sana. Unaweza kujifunza kila kitu kutoka kwake.
Jifunze kila siku
Mjasiriamali unatakiwa kujifunza kuhusu biashara mpya au kujifunza zaidi kuhusu biashara ambayo unaifanya ili uweze kuwa bora zaidi na kuifanya kwa ubora. Katika kujifunza jifunze kwa vitu ambavyo vinalenga kuiboresha biashara yako ili uweze kupata mbinu mpya na kuwa bora zaidi. Kujifunza huku kutakufanya kufanya vitu kwa ubora na kuwa tofauti katika kutoa huduma na kuifanya biashara yako kuwa bora na kuvutia wateja wengi zaidi.
Mwandishi: Emmanuel Mahundi
Mawasiliano emmanuelmahundi@gmail.com au 0714 445510
Kwa kujifunza zaidi tembelea www.wekezamtanzania.blogspot.com
Makala imehaririwa kwa Kiswahili fasaha na Rumishael Peter ambaye ni Mhariri wa vitabu/makala za Kiswahili na Mjasiriamali Email: rumishaelnjau@gmail.com simu 0713 683422. http://rumishaelnjau.wix.com/editor
Huu Ndio Mtaji Mkubwa Ambao Tayari Unao.
Labda niane kwa kueleza kuwa hakuna mtu ambae hana mtaji huo. Mtaji wenyewe unautengeneza mwenyewe kuweza kuwa bora kwani tayari unao. Mtaji wenyewe ni watu. Watu wanaweza kukuwezesha au kukuangusha kutegemea na unavyowatumia. Wanasiasa, walimu, wanasheria, wafanyabiashara huhitaji watu ili kuweza kufanikisha malengo yao. Hakuna kiongozi yeyote wa siasa ambaye amewahi kufanikiwa bila kuwa na watu. Hakuna mfanyabiashara aliyefanikiwa bila kuwa na mtaji wa watu. Ili uweze kufanikiwa ni lazima uweze kuwa na watu wa kufanya nao kazi, kukutia moyo, kukufariji na hata wa kukupa changamoto zitakazokuimarisha.
SOMA; Kila Suluhisho Linatengeneza Tatizo, Chagua Ni Tatizo Gani Unataka.
Ukihitaji mafanikio utahitaji watu ambao utafanya nao kazi, utahitaji watu wa kununua bidhaa zako, utahitaji watu wa kukukopesha, utahitaji watu wa kukufanyia kazi, utahitaji watu wa kukushauri na kwa vyovyote vile huwezi kufanikiwa bila kuwa na watu. Hayati Nelson Mandela aliwahi kusema kwamba ‘’ukitaka kutembea haraka tembea mwenyewe, lakini ukitaka kutembea umbali mrefu basi tembea na watu’’. Jaribu kuutumia msemo huu katika maisha yako ya kawaida na utaona uhalisia wake. Jaribu kujijengea watu wa kukuinua na sio wa kukuangusha. Jaribu kujijengea mtandao bora ambao utakufaa. Ukijenga mtandao mbovu utakuangusha sawa na kujenga nyumba yenye msingi mbovu, Itaanguka siku moja. Je kuna ulazima wa kuwa na watu wengi? Jibu linaweza kuwa ndiyo au hapana. Kuwa na watu wengi wenye lengo la kukuangusha au kukurudisha nyuma si mali kitu. Ni bora kuwa na watu wawili watakaokusaidia. Laini pia kama kuna ulazima wa kuwa na watu wengi jifunze namna ya kuwapata kwa kujifunza kupata na kukaa na watu.
SOMA; Mipango Sio Muhimu Kama Kitu Hiki.
Kwa kuhitimisha nitumie fursa hii kukuambia kuwa na watu halafu usishirikiane nao utaukuwa hujafanya chochote. Jifunze kushirikiana na watu. Usimdharau yeyote bali muheshimu kila mtu kwa nafasi yake kwani hujui atakuja kukufaa lini. Nakushauri pia uondoe watu wanaokuletea mawazo hasi na kukuaminisha kuwa huwezi. Hao watakufanya usifikie malengo yako. Usipende kukaa na watu ambao wataupoteza muda wako kwa vitu visivyokujenga. Bali tumia kila sekunde moja ya masha yako kukujenga na tumia watu waliofanikiwa kuweza kujifunza kutoka kwao.
Nakutakia heri ya pasaka na mapumziko mema ya siku ya kumbukumbu ya Karume. Tukutane wiki ijayo siku ya leo kwa makala nyingine ya kukujenga.
Makala hii imeandikwa na Nickson Yohanes ambae ni mjasirimali na mhamasishaji. Unaweza kuwasiliana na nae kwa kwa: simu: 0712 843030/0753 843030 e-mail: nmyohanes@gmail.com
Pia unaweza kutembelea blog yake: www.lifeadventurestz.blogspot.com kujifunza zaidi.
KITABU; Jinsi Ya Kufaidika Na Mabadiliko Yanayotokea Kwenye Maisha.
Kama kuna kitu kimoja ambacho tuna uhakika nacho hapa duniani ni kwamba dunia inabadilika kila siku. Ukiangalia historia ya dunia tulikotoka na tulipo sasa kumetokea mabadiliko makubwa sana. Zilianza zama za mawe, zikaja zama za chuma, yakaja mapinduzi ya viwanda na hata sasa tupo kwenye mapinduzi ya kiteknolojia.
Jambo moja la kushangaza ni kwamba pamoja na mabadiliko haya kuwa wazi bado watu wengi ni wagumu sana kubadilika. Watu hawapendi mabadiliko, wanapenda kufanya kile walichozoea kufanya na wanataka maisha yaendelee vile yalivyokuwa jana na leo. Kitu ambacho ni ndoto isiyowezekana.
Katika zama zote ambazo dunia imepita, kuna watu ambao waliweza kubadilika haraka na kupata faida ya mabadiliko, wengine walilazimishwa kubadilika na hivyo kuburuzwa na kuna ambao waliachwa na mabadiliko na hivyo kupotea. Waliofaidika na mabadiliko ni wale waliokuwa tayari kubadilika, walioburuzwa na mabadiliko ni wale ambao walikuwa hawajui kama kuna mabadiliko ila wanakwenda tu na hali ilivyo. Walioachwa na mabadiliko ni wale ambao hata baada ya kuona mabadiliko wao waligoma kubadilika, waliendelea kung’ang’ania kile walichozoea na hatimaye kuachwa nyuma na kupotea.
Mabadiliko ni jambo muhimu sana lakini watu wengi hawajalipa msisitizo kwenye maisha na hii inapelekea wengi kuachwa nyuma na mabadiliko haya.
Ni kutokana na umuhimu wa jambo hili nimekuandalia kitabu kinachoitwa JINSI YA KUFAIDIKA NA MABADILIKO YANAYOTOKEA KWENYE MAISHA.
Katika kitabu hiki utajifunza mambo yafuatayo;
1. Historia fupi ya mabadiliko kwenye maisha ya mwanadamu hapa duniani na kwa nini mabadiliko yataendelea kutokea.
2. Mabadiliko makubwa yanayotokea kwenye elimu, kazi na hata biashara.
3. Makundi ya aina tatu ya watu ambao wanazalishwa na mabadiliko, kundi linalonufaika na mengine yanayopoteza.
4. Mambo kumi muhimu sana ya kufanya ili na wewe uingie kwenye kundi ambalo linanufaika sana na mabadiliko ambayo yanaendelea kutokea
5. Mabadiliko makubwa yanayokuja kwenye mfumo wa elimu, mfumo wa ajira na hata biashara na ujasiriamali.
Kitabu hiki kitakuandaa wewe na kukupa mbinu za kuweza kuboresha maisha yako zaidi na kufanikiwa licha ya mabadiliko yanayoendelea.
Kitabu hiki ni muhimu sana kwa makundi yafuatayo;
1. Wanafunzi wa vyuo vikuu ambao wanasoma ila hawana uhakika wa kupata ajira. Kitawawezesha kujiandaa mapema ili kujua njia watakayochukua na hivyo kutopoteza muda wakisubiri ajira ambazo hazipo.
2. Wafanyakazi ambao wamekuwa kwenye kazi kwa muda mrefu lakini hawaoni manufaa ya kazi zao kwenye maisha yao.
3. Wafanyabiashara ambao wamefanya biashara kwa muda mrefu ila wako pale pale miaka nenda miaka rudi.
4. Wafanyakazi ambao wamestaafu kazi, wamefukuzwa kazi, wamepunguzwa kazi au wameamua kuacha kazi wenyewe.
5. Watu ambao umri wao umekwenda kiasi na wanaamini kwamba mambo waliyokuwa wanafanya zamani ni bora kuliko yanayofanyika sasa, na wanaendelea kuyafanya licha ya kushindwa kupata majibu makubwa.
6. Mtu yeyote ambaye anataka kuboresha maisha yake zaidi, kwa kujua mambo yanayoendelea na ni yapi yanakuja kwa siku za mbeleni.
Ni muhimu sana wewe kupata na kusoma kitabu hiki, kitaleta mabadiliko makubwa sana kwenye maisha yako kama utakuwa tayari kufanyia kazi yale ambayo utajifunza.
JINSI YA KUPATA KITABUJINSI YA KUFAIDIKA NA MABADILIKO YANAYOTOKEA KWENYE MAISHA.
Kitabu hiki kipo kwenye mfumo wa soft copy yaani pdf na unaweza kukisoma kwenye simu yako kama ni smartphone, unaweza kukisoma kwenye tablet na pia unaweza kukisoma kwenye kompyuta. Kurasa zake zinasomeka vizuri kwenye vifaa hivyo vya aina tatu tofauti.
Gharama ya kitabu hiki ni tsh elfu tano(5,000/=), gharama hii ndogo sio kwa sababu kina mambo madogo ila ni kwa sababu kitabu hiki ni muhimu sana na kila mtu ni muhimu akisome, hivyo gharamaisiwe kikwazo cha watu kushindwa kukisoma.
Kupata kitabu unafanya malipo ya tsh 5,000/= kupitia namba 0717396253 au 0755953887 na kisha unatuma email yako kwenye moja ya namba hizo na unatumiwa kitabu mara moja.
Mambo sasa hivi yanakwenda kidigitali zaidi na huna haja ya kubeba mizigo mingi, kwa kuwa na simu yako tu unaweza kuendelea kujifunza mambo mengi sana.
Karibu sana upate kitabu hiki mapema, kwa sababu jinsi unavyozidi kuchelewa kukipata, mabadiliko yanaendelea kutokea na yanakuacha nyuma. Jinsi utakavyoweza kuchukua hatua haraka ndivyo unavyoweza kuiokoa na kuimarisha kazi yako au biashara yako. Chukua hatua haraka kwa kusoma kitabu hiki leo.
Pia tembelea blog ya VITABU VYA UJASIRIAMALI NA MAFANIKIO ili kupata vitabu vingine vingi na vizuri vya kukuwezesha kufikia mafanikio makubwa kwenye jambo lolote unalofanya.
Jipatie kitabu chako leo, maisha hayakusubiri wewe uwe tayari.
Nakutakia kila la kheri katika safari yako ya kuboresha maisha yako, na kitabu hiki kiwe nguzo muhimu sana kwako.
TUPO PAMOJA.
Siri Kubwa Unayotakiwa Kujua Kwenye Mahusiano Ya Kibiashara.
Mahusiano unayojenga na watu kibiashara yanaweza kuwa ya aina mbili;
1. Uhusiano ambao kila mmoja anafaidika(win - win)
2. Uhusiano ambao mmoja ananufaika zaidi ya mwingine(win - lose)
Kwa bahati mbaya sana kwenye mazingira yetu mahusiano yaliyotawala ni ya aina ya pili.
Watu wengi watakaotaka kujenga mahusiano ya kibiashara na wewe watataka kiunufaika zaidi yako.
Kuwa mjanja, angalia mbali.
Ukiona uhusiano wa aina hii kimbia, hautakufikisha mbali.
Unapokuwa Tayari Kuingia Kwenye Ujasiriamali Fanya Vitu Hivi Vitano.
Kuna watu ambao wangetamani kuwa wajasiriamali. Wanapoona mafanikio ya wajasiriamali wakubwa wanatamani sana kama wangekuwa wao.
Hijalishi unatamani kiasi gani kuwa mjasiriamali, tamaa yako tu haitakuwezesha kufikia mafanikio katika ujasiriamali. Ni lazima uwe na misingi ambayo utaisimamia ndio uweze kuona mafanikio makubw akupitia ujasiriamali.
Kwanza ni lazima uondoke kwenye kutamani na uingie kufanya na ukishaingia kufanya uwe tayari kukabiliana na lolote litakalojitokeza mbele yako.
SOMA; Maswali Matatu Muhimu Ya Kujiuliza Kwenye Wazo Lako La Biashara.
Leo hapa UTAJIONGEZA na vitu vitano muhimu vya kufanya unapokuwa tayari kuingia kwenye ujasiriamali.
1. Usianze tena kujishuku.
Ukishaamua kwamba wewe umechagua njia ya ujasiriamali, sahau kuhusu kujishuku na kuanza kuwa na wasi wasi kama kweli utaweza. Kikubwa ni nia yako ya kufikia mafanikio kupitia ujasiriamali. Matatizo, changamoto na vikwazo kila mtu anavipitia. Hivyo acha kuwa na wasi wasi kama utaweza na jitoe kwa asilimia 100 kufanya kile ambacho umeamua kufanya.
Kwenye ujasiriamali hakuna kujaribu, kuna kufanya. Fanya sasa na ondoa wasi wasi na hofu.
SOMA; SIRI YA 20 YA MAFANIKIO; Iendee Dhahabu...
2. Kuwa na mshauri.
Kuna ushauri wa bure ambao unapatikana kila mahali kwenye maisha yetu ya kitanzania. Ushauri kama, biashara fulani inalipa kweli yani, ukianza kuifanya tu, utapata mafanikio makubwa. Ukimuangalia anayekupa ushauri huo nae amesikia kwamba biashara hiyo inalipa.
Sasa hawa sio washauri ambao nakuambia uwe nao. Nakuambia uwe na mshauri ambaye anaelewa ni nini hasa anachokuambia. Mtu ambaye amekuwa kwenye safari ya ujasiriamali na anaujua ugumu wa safari hiyo. Mtu ambaye hatakuwa mnafiki kwako kukuambia mambo ili tu kukupa moyo na kukufurahisha, bali atakuambia ukweli, na ukweli huu utakufanya uweze kutumia mazingira yako vizuri kufikia mafanikio.
SOMA; UKURASA WA 43; Ushauri Wa Bure Una Gharama Kubwa.
3. Jitengenezee utaratibu wako wa kila siku, ambao utauheshimu.
Tofauti ya ujasiriamali na kazi zingine ni kwamba kwenye ujasiriamali wewe unajiongoza mwenyewe. Hakuna atakayekugombeza au kukutishia kukufukuza kazi kama utakuwa mzembe. Na hii ni hatari kubwa sana kwa sababu kama huwezi kujiongoza mwenyewe utashindwa kwenye ujasiriamali.
Njia rahisi ya kuweza kuanza kujiongoza mwenyewe ni kuwa na utaratibu wako wa kila siku ambao utaufuata na kuuheshimu. Ipangilie siku yako kabla hujaianza na weka vipaumbele kwenye malengo na mipango yako kwenye maisha na kupitia ujasiriamali unaofanya.
4. Acha kukaa na watu ambao wanakurusisha nyuma.
Tumeshajadili hili mara nyingi sana kwamba wewe ni wastani wa watu watano ambao wanakuzunguka. Hivyo kama umezungukwa na watu watano ambao hawana malengo yoyote kwenye maisha yako, ni vigumu sana wewe kuweka malengo na kuyasimamia. Hivyo wewe unapoamua kuingia kwenye ujasiriamali usikubali kukaa tena na watu ambao mawazo yao yanakurudisha wewe nyuma. Wewe unajua kwamba kwenye ujasiriamali, hasa wakati wa mwanzo unaweza kujikuta unafanya kazi mpaka masaa 16 au 20 kwa siku, lakini rafiki zako wanataka kila siku jioni mkutane mkipata moja moto na moja baridi, hii hutaiweza wewe kama mjasiriamali, niamini.
SOMA; UKURASA WA 11; Watu Hawa Wanakurudisha Nyuma.
5. Kuza mtandao wako.
Tumesema sana hili pia, haijalishi unajua nini bali unamjua nani. Unapoamua kuingia kwenye ujasiriamali hakikisha kila mtu anayehusika na aina ya ujasiriamali unaofanya anajua kuhusu wewe na kile unachofanya. Angalia watu muhimu ambao unahitaji ushirikiano wao, watafute, angalia ni jinsi gani unaweza kuwasaidia ili nao wakusaidie, kukua zaidi.
Kama unafikiri kwenye ujasiriamali utashinda kwa jeshi la mtu mmoja umepotea njia, ongea na watu wengi uwezavyo, wajue unachofanya na wao watakuunganisha na watu wengi zaidi.
Haya ndio mambo matano muhimu sana ya wewe kufanya pale unapoamua kwamba ujasiriamali ndio maisha yako. Na miaka sio mingi kila mtu atahitaji kuwa mjasiriamali, hivyo ni vyema kama utaanz akujiandaa mapema.
Kwa ushauri wowote kuhusu biashara na ujasiriamali tafadhali tuma email kwenda ushauri@kisimachamaarifa.co.tz
Nakutakia kila la kheri kwenye mafanikio kupitia ujasiriamali.
TUPO PAMOJA.
Weka Pamoja Vitu Hivi Vitatu Na Tayari Wewe Ni Mjasiriamali Mwenye Mafanikio Makubwa.
Kama tayari una kundi la watu wanaokufuata, na wanaosikiliza unachosema, ila huna cha kuwauzia, huna biashara.
Kama una bidhaa au huduma unayouza ila hakuna mtu yuko tayari kununua huna biashara.
SOMA; Sifa TATU Unazohitaji Ili Kufanikiwa Kwenye Ujasiriamali.
Kama una bidhaa au huduma unayouza na watu wapo tayari kununua ila huna njia rahisi ya wateja kuweza kukulipa huna biashara.
Kama ukiwa na bidhaa au huduma unayouza, ukawa na watu ambao wako tayari kuinunua, na ukawa na mfumo mzuri wa watu kukulipa ili kuipata, hongera una biashara kubwa ambayo itakuletea mafanikio.
Kwa kuweza kufikia vigezo hivyo vitatu na kuviweka pamoja wewe ni mjasiriamali mwenye mafanikio.
Kila la kheri.
SOMA; Huyu Ni Mjasiriamali Mwenye Hamasa Kubwa sana. Unaweza kujifunza kila kitu kutoka kwake.
Huyu Ni Mjasiriamali Mwenye Hamasa Kubwa sana. Unaweza kujifunza kila kitu kutoka kwake.
Moja ya vitu ambavyo vitakuwezesha wewe kufanikiwa kwenye ujasiriamali ni kupend akile unachokifanya. Kama kweli unapenda unachofanya, utakuwa na hamasa kubwa sana ya kukifanya.
Hamasa hii ndio inakuwezesha kuvuka vikwazo, kuwa mbunifu na kuweza kufikia mafanikio makubwa sana.
Kuna mjasiriamali mmoja mkubwa sana duniani ambaye ana hamasa kubwa sana ambayo huwa inawashangaza wengi. Pamoja na mafanikio makubwa aliyonayo, bado haoni shida kufanya mambo madogo madogo ambayo yanamfanya azidi kufikia mafanikio makubwa.
Mjasiriamali ninayemzungumzia ni Richard Branson. Huyu ni raia wa uingereza na anamiliki kampuni kubwa ya Virgin Group ambayo ina kampuni zaidi ya 400 chini yake. Huyu ni mmoja wa watu matajiri sana duniani, akikadiriwa kuwa na utajiri wa dola bilioni 4.9.
Leo hapa utajiongeza na baadhi ya mambo anayofanya Branson ambayo yatakufanya na wewe uwe na hamasa zaidi kwenye ujasiriamali unaofanya.
Katika ufunguzi wa hotel mpya chini ya kampuni yake ya Virgin, kulikuwa na tetesi kwamba Richard alikuwa anawatembelea wateja wake usiku na kuwafurahisha zaidi.
Tetesi hizo zilithibitishwa na Branson mwenyewe pale alipowatembelea wateja chumbani kwao na kuwasomea hadithi wakati wa kulala. Kama ambavyo wazazi huwa wanawasomea watoto wao hadithi.
Unaweza kuona ni kitu kidogo ila kinajenga picha kubwa sana kwake na kwa biashara zake. Hii inaonesha jinsi anavyojali biashara zake na anavyotoa huduma bora kwa wateja.
Angalia video ya tukio zima hapo chini;
Njia TATU Za Kufanya Moto Wa Ujasiriamali Uendelee Kuwaka Kwenye Nafsi Yako…
Hakuna maisha mazuri kama ya ujasiriamali, kama unajielewa na unaweza kujisimamia, ujasiriamali ni maisha yenye uhuru mkubwa sana.
Unapokuwa na wazo la ujasiriamali mwanzoni ni kama moto unawaka ndani yako. Unakuwa na hamasa kubwa sana ya kutekeleza wazo lako na unakuwa na mapenzi makubwa kwa unachofanya.
Ila kwa bahati mbaya sana unapoingia kwenye ujasiriamali na kuanza kufanya biashara zako za kila siku ni rahisi moto huu kuzimika na kujikuta unakosa hamasa ya kuendelea. Na pale unapokutana na changamoto, ambazo ni lazima ukutane nazo ni rahisi kukata tamaa.
Leo UTAJIONGEZA na njia tatu za kufanya moto wa ujasiriamali uendelee kuwaka kwenye nafsi yako. Hii itakufanya uendelee kuwa na hamasa kubwa na kupenda kile unachofanya. Hata utakapokutana na changamoto itakuwa rahisi sana kwako kuzitatua na kuendelea ili kufikia mafanikio makubwa zaidi.
SOMA; UKURASA WA 35; Usijaribu Kumfurahisha Kila Mtu.
1. Washa moto wa ujasiriamali kila siku.
Kila siku kabla ya kuanza siku yako, washa moto wa ujasiriamali kwenye nafsi yako. Unawashaje moto huu? Ni rahisi, kila siku jikumbushe ni nini ambacho kilikufanya uingie kwenye ujasiriamali unaofanya. Kama sababu yako ni kubwa, kwa kujikumbusha kila siku na kujiambia sababu hiyo itakuwa hamasa kubwa ya wewe kufanya mambo makubwa kwa siku hiyo.
Kila siku jikumbushe kilichokufanya uingie kwenye ujasiriamali.
2. Penda matatizo/changamoto.
Kwa sehemu kubwa kilichokufanya uingie kwenye ujasiriamali ni kutatua matatizo ya watu, au kuwapatia njia bora zaidi. Katika mchakato huu na wewe pia utaingia kwenye matatizo au changamoto mbalimbali.
Kama utaziogopa changamoto hizi, itakuwa rahisi kwa wewe kukosa hamasa ya kuendelea. Ila kama utayapenda matatizo na changamoto unazokutana nazo, utazipatia ufumbuzi na utaweza kuendelea na safari.
SOMA; NENO LA LEO; Viti Viwili Ambavyo Kila Mtu Anataka Kwenye Maisha.
3. Usikubali majukumu ya kila siku kukupoteza lengo lako.
Wewe kama mjasiriamali ulianza na wazo moja, lakini kwenye kutekeleza wazo hilo umeingia kwenye biashara ambayo ina vipengele vingi sana. Kwa kujaribu kufanya kila eneo la biashara yako kunaweza kukuchosha na ukasahau lengo lako kubwa lilikuwa nini.
Chagua mambo machache ambayo unayapenda kweli kuyafanya na yafanye vizuri sana, hii itakupatia hamasa kubwa ya kuendelea kufanya zaidi. Mambo mengine yote tafuta watu wanaoweza kufanya na waajiri wafanye mambo hayo.
Kadiri unavyofanya vitu vichache vinavyokuhamasisha, ndivyo unavyopata majibu mazuri na ndivyo moto wa ujasiriamali utaendelea kuwaka ndani yako.
SOMA; #HADITHI_FUNZO; Mbinu Rahisi Iliyomwezesha Jenerali Kushinda Vita Ngumu.
Hatua TANO Za Kuongeza Uzalishaji Wako Ili Kufikia Mafanikio.
Kuna usemi mmoja maarufu sana unaosema “ukiendelea kufanya unachofanya sasa, utaendelea kupata matokeo unayopata sasa”. Kwa lugha nyingine kama unataka kubadili matokeo yako, ni lazima uanze kwa kubadili kile unachofanya.
Ili uweze kufikia mafanikio zaidi ya uliyonayo sasa, kwa sababu mpaka hapo ulipo tayari una mafanikio, unahitaji kubadili njia unazotumia sasa. Na kitu cha kwanza kabisa kubadili ni uzalishaji wako.
Uzalishaji tunaozungumzia hapa ni ile kazi au thamani unayotoa kwa wengine kwa muda unaofanya kazi. Hivyo kama utazalisha thamani zaidi kwa muda mfupi maana yake una uzalishaji mkubwa. Na hii ni njia nzuri ya kufikia mafanikio kwenye chochote unafanya, iwe ni kazi au biashara.
Kiuchumi, utajiri au thamani ya kampuni, mtu binafsi na hata jamii kwa ujumla unapimwa kwa ongezeko la uzalishaji.
SOMA; Sifa TATU Unazohitaji Ili Kufanikiwa Kwenye Ujasiriamali.
Leo UTAJIONGEZA na hatua tano unazoweza kutumia na ukaongeza uzalishaji wako na hatimaye kufikia mafanikio zaidi.
Hatua ya kwanza na rahisi kabisa ya kuongeza uzalishaji wako ni kuwa bora kwenye majukumu yako. Kufanya kazi kwa juhudi na maarifa na kuendelea kujifunza zaidi. Kama unafanya biashara, ijue vizuri biashara yako na ongeza juhudi. Kama umeajiriwa, unajua majukumu yako kikazi, yatekeleze vizuri.
Hatua ya pili ni kutafuta mtu ambae anaweza kufanya hiko unachofanya na kwa bei rahisi kisha unampa afanye. Kama ni mfanyabiashara maana yake unatafuta watu wa kukusaidia. Kama ni ajira unafanya kazi na watu wengine ambao wanakusaidia. Ukweli ni kwamba kazi inayofanyika kwa timu inafanyika kwa uzalishaji mkubwa.
SOMA; Tabia Mbaya KUMI(10) Zinazopunguza Ufanisi Wako.
Hatua ya tatu ya kuongeza uzalishaji ni kutumia teknolojia iliyopo. Hapa unatafuta njia ambayo teknolojia inaweza kurahisisha kazi unazofanya. Kwa mfano badala ya kuandika kila barua kwa mkono, inaweza kuandikwa moja na zikatolewa kopi na mashine. Kila kazi inaweza kusaidiwa na teknolojia.
Hatua ya nne ni kuvumbua teknolojia mpya inayoweza kurahisisha kazi zako. Na ukifikia hatua hii unakuwa umetatua tatizo la wengi. Inawezekana kwa kila kazi unayofanya kuvumbua njia rahisi ya kiteknolojia ya kuirahisisha.
Hatua ya tano na ya mwisho ya kuongeza uzalishaji wako ni kujua vitu vinavyoleta uzalishaji mkubwa kwako na kufanya hivyo tu. vingine vyote unaacha kuvifanya kwa sababu vinakupotezea muda. Kwa mfano asilimia 80 ya mafanikio yako inatokana na asilimia 20 ya kazi unazofanya. Je ni kazi zipi hizo zinakuletea faida kubwa? Zijue kazi hizi na zifanye kwa ufanisi mkubwa na utaongeza uzalishaji wako.
SOMA; SIRI YA 4 YA MAFANIKIO; Itumie Sheria Ya Wastani Kukuletea Mafanikio.
Mwisho wa siku kinachoongeza uzalishaji ni pale unapojua kile chenye faida kwako na kukifanya. Hii ndio inayoleta faida kwenye makampuni, biashara na hata kazi. Wale wanaojaribu kufanya kila kitu huishia kuwa na uzalishaji mdogo. Wale wanaochagua vichache na kuvifanya vizuri huwa na uzalishaji mkubwa.
Sifa TATU Unazohitaji Ili Kufanikiwa Kwenye Ujasiriamali.
Mafanikio kwenye ujasiriamali yanachangiwa na vitu vingi sana. Kupitia blog hii JIONGEZE UFAHAMU tumeshajifunza vitu vingi sana vinavyokuwezesha wewe mjasiriamali kufikia mafanikio makubwa.
Vitu kama kuweka malengo na mipango, kufanya kazi kwa juhudi na maarifa, kuwa mwaminifu, kutokata tamaa na vingine vingi ni muhimu sana kw akila mjasiriamali ili aweze kufanikiwa.
Leo UTAJIONGEZA na sifa tatu muhimu ambazo zitakuwezesha kufikia mafanikio kupitia ujasiriamali.
SIFA YA KWANZA; Kuwa Mtu Wa Watu.
Kuwa mjasiriamali maana yake wewe upo kwenye biashara ya watu. Mafanikio yako yote kwenye ujasiriamali yatatokana na watu wanaokuzunguka. Watu hao ni wateja wako, wafanyakazi wako, wawekezaji, washirika na hata watu wengine wa karibu.
Jinsi unavyoweza kwenda vizuri na watu wengi ndivyo utakavyoweza kutengeneza mafanikio makubwa.
SOMA; Hatua Tatu Za Kujua Kama Wazo Lako La Biashara Zuri.
SIFA YA PILI; Kuwa na Nidhamu.
Nidhamu ndio kila kitu ndugu yangu. Unapokuwa mjasiriamali hakuna wa kukusimamia utekeleze majukumu yako. Kama utakuwa mtu wa kujiendekeza utajikuta unabaki nyuma kila siku. Ni lazima uwe na nidhamu ambayo itakufanya uweze kufuata malengo na mipango yako hata kama mazingira ni magumu kiasi gani.
SOMA; Tabia Mbaya KUMI(10) Zinazopunguza Ufanisi Wako.
SIFA YA TATU; Penda Unachofanya.
Safari ya ujasiriamali inaweza kuwa ndio safari ngumu kuliko safari zote duniani. Kama ulikuwa hujui hilo jua leo. Na kinachofanya iwe ngumu ni ukweli kwamba utashindwa. Na utashindwa mara nyingi kiasi kwamba kama haupendi kile unachofanya kwa roho moja utaishia kukata tamaa.
Penda sana kile unachofanya, penda kujifunza zaidi na penda kuwasaidia wengine kupitia unachofanya na mafanikio hayatakuwa na ujanja wa kukukimbia.
Hizo ndio sifa tatu muhimu za kukuwezesha kufikia mafanikio makubwa kama mjasiriamali. Uzuri ni kwamba tabia hizi unawez akujitengenezea na kuweza kufikia mafanikio makubwa.
Nakutakia kila la kheri katika mafanikio yako kwenye ujasiriamali.
SOMA; SIRI 50 ZA MAFANIKIO.
Fikra TANO Zinazoua Mafanikio Na Jinsi Ya Kuziepuka.
Mpaka sasa unajua kwamba tofauti kubwa ya watu waliofanikiwa na wasiofanikiwa inaanzia kwenye fikra zao. Kama bado hujajua ndio nakuwambia leo na nitakuambia mawazo ya aina tano ambayo yanaua kabisa mafanikio yako.
Tunajua kwamba kuwa na mawazo chanya ni kitu muhimu sana ili kufikia mafanikio. Hivyo kuepuka mawazo hasi ni hatua ya kwanza ya kufikia mafanikio. Ila mawazo ya aina tano tutakayokwenda kujifunz ahapa leo yanaweza yasionekane kama ni hasi na ndio maana watu wengi wanashindwa kuyatambua mapema.
SOMA; Hii Ni Kazi Yenye Malipo Makubwa Sana Ambayo Unaweza Kujifunza Kuifanya
Kwa kujua mawazo haya na jinsi ya kuyaepuka itakuwa msaada sana kwako kufikia mafanikio.
1. Mimi sio mtaalamu.
Mara nyingi sana umekuwa ukitumia sababu hii kwamba unashindwa kufanya zaidi kwenye kazi yako au biashara yako kwa sababu huna utaalamu mkubwa. Sawa huenda ni kweli huna utaalamu mkubwa ila je unachukua hatua gani?
Kumbuka hakuna mtu aliyezaliwa na utaalamu wowote, vitu vyote tunajifunza hapa duniani. Hivyo kama kuna utaalamu ambao unajua utakusaidia sana kwenye kazi au biashara zako anza kujifunza. Kwa bahati nzuri tunaishi kwenye dunia ambayo kujifunza sio lazima uende darasani, popote ulipo unaweza kujifunz ana kutendea kazi yale uliyojifunza na baada ya muda ukawa mtaalamu.
SOMA; Kauli Mbili Za Kuacha Kutumia Leo, Maana Zinaashiria Kushindwa.
2. Hicho kimeshafanyika.
Kuna wakati ambapo unapata wazo zuri la kufanya kitu ambacho kitakufaidisha sana kwenye kazi au biashara. Ila unapofuatilia kwa makini unagundua kwamba kuna watu wengine tayari wanafanya. Kwa kuwa na mawazo ya aina hii unajiondoa mwenyewe kwenye safari ya mafanikio.
Hata kama kitu kimefanyika na watu wengi kiasi gani, kama ndio kitakachokusaidia kifanye. Ila wewe kifanye kwa utofauti na upekee ili uweze kunufaika zaidi. Kama kuna biashara unayotaka kufanya na ukakuta wengine wanaifanya unatakiwa kufurahi kwa sababu tayari una uhakika kwamba soko lipo, hivyo kazi yako ni kujua jinsi gani utavutia na kuwabakiza wateja kwenye biashara yako.
3. Sina ‘connection’
Ni kweli kabisa na pia nilishaandika kwamba haijalishi unajua nini bali unamjua nani, mafanikio yako yatategemea sana na watu unaojuana nao na walioko kwenye mtandao wako. Hivyo ni rahisi sana kuamini kwamba kwa kuwa hujuani na watu waliofanikiwa basi huwezi kufanikiwa.
Swali ni kwamba unataka watu waliofanikiwa waje wakutafute wewe? Wakutafute kwa sababu gani? Wewe ndio unatakiw akuanzisha kitu hiki. Angalia ni watu gani ambao unahitaji kuwa nao kwenye mtandao wako, kisha angalia ni kitu gani unaweza kuwasaidia. Omba nafasi ya kuwasaidia kitu hiko na utakuwa umeanzisha connection muhimu sana kwako. Ndio watu wenye mafanikio ni vigumu sana kuwapata ila kama kweli unataka kuwapata utafanikiwa kuwapata.
4. Sina hela.
Angalau hii ni sababu ambayo karibu kila mtu anaitumia wakati mmoja au mwingine. Kwa nini huanzi biashara, sina mtaji. Kwa nini biashara yako haikui, sina fedha. Kwa nini hujafikia mafanikio, sina fedha. Sawa huna fedha, swali ni je unataka nani aje akuletee fedha hapo ulipo? Hakuna, kama unasubiri unapoteza muda wako bure. Anzia hapo ulipo, anza na ulichonacho. Kama unataka kuanza biashara anza na kiasi kidogo unachoweza kuanzia, endelea kukua na pale unapokuwa makini utaanza kuona fursa nyingi za kukuza biashara yako. Lakini kama utasema huna fedha, huna mtaji na ukaendelea kulala, nakutakia usingizi mwema.
SOMA; Sababu 10 Kwa Nini Hutafikia Malengo Yako 2015.
5. Nimejaribu sana lakini nashindwa.
Umesema nijifunze ili niwe mtaalamu, nimeshajifunza sana lakini siwezi.
JIBU; Bado hujajifunza vya kutosha, au haupo makini kwenye kujifunza kwako. Anza tena na jua ni nini hasa unachotaka. Usikate tamaa mpaka utakapofikia.
Umesema hata kama kitu kimefanywa naweza kukifanya na nikafanikiwa, nimeshajaribu hivyo lakini napata hasara tu.
JIBU; Unafanya kama kila mtu anavyofanya, weka ubunifu, jitofautishe, usiwe wa kawaida.
Unasema kama nahitaji connection nianze mimi kutafuta yule ninayetaka connection yake, nimejaribu sana, nimeenda ofisini kwa mtu niliyetaka kupata connection yake masecretary wamenizuia, wameniambia niandike barua na nieleze shida zangu nitapewa wa kunisaidia ila sio yule ninayemtaka.
JIBU; Ongeza juhudi, badili mbinu za kuweza kumpata mtu huyo, anza kufikiria ni jinsi gani unaweza kumsaidia, mwandikie kila unachofikiri kitamfanya atake kujua ni nani amempa mawazo hayo mazuri. Wakati huo huo kuwa bora kwenye kile unachokifanya, watu watakuongelea na moja kwa moja utapata nafasi ya kuonana na waliofanikiwa zaidi.
Unasema nianze kidogo hata kama mtaji sina, hata hicho kidogo sina, nilijaribu kuanz akidogo nimepata hasara na sasa sina hata pa kuanzia.
JIBU; Kama huna hata kidogo cha kuanzia kuna uwezekano mkubwa hujui unachotaka kufanya. Kama ulianza kidogo na umeshindwa, anza tena, ndio safari ya mafanikio ilivyo.
Hizo ndio fikra tano za kuondokana nazo ili uweze kufikia mafanikio. Kumbuka pamoja na yote haya maamuzi yanabaki kwenye mikono yako. Ukiamua kuyatumia haya kwenye maisha yako, utakuwa kwenye nafasi nzuri ya kufanikiwa. Ukiamua kuachana nayo utaendelea hivyo ulivyo.
Nakutakia kila la kheri.
makirita@kisimachamaarifa.co.tz
Njia KUMI Za Kuboresha Maisha Yako Ya Kibiashara.
Ili kuweza kufanikiwa kwenye biashara na hata kwenye maisha unahitaji kuwa na malengo na mipango, kufanya kazi kwa bidii na maarifa na hata kuwa na mtizamo chanya kwenye kile unachofanya na hata maisha yako kwa ujumla.
Hakuna kitu kinachowarudisha watu nyuma kama kutokuwa na malengo, uvivu na mtazamo hasi.
Pamoja na mambo hayo muhimu kuna njia kumi unazoweza kuzitumia na ukaboresha maisha yako ya kibiashara kwa kiasi kikubwa sana.
1. Kubali changamoto.
Hakuna barabara iliyonyooka, hivyo hivyo biashara yoyote utakayofanya, hata kama ingekuwa rahisi kiasi gani ina changamoto zake. Unapokutana na changamoto, ikubali na kisha anza kuitatua. Ukianza kuikimbia unajijengea matatizo makubwa baadae.
SOMA; Wajasiriamali Wenye Mafanikio Hufanya Mambo Haya Matano Kila Siku.
2. Jitegemee.
Ili uweze kufikia mafanikio kwenye biashara unayofanya, kuna wakati utahitaji kufanya maamuzi magumu na uweze kuyasimamia. Maamuzi hayo yanaweza yasiwe mazuri au yasiwapendeze wengi. Ni lazima uweze kujtegemea na kujisimamia kwenye biashara yako. Kama utaendesha biashara kwa kutegemea wengine wanafanya nini ndio uige, huwezi kufanikiwa.
3. Zione fursa.
Katika kila hali unayokutana nayo kwenye biashara, zione fursa mbalimbali zinapokuzunguka. Unapopata changamoto angalia ni fursa gani unayoweza kuitoa kwenye changamoto hizo. Kuwa na kiu ya kuangalia fursa na utaanza kuziona nyingi sana zinazokuzunguka.
4. Cheka.
Hata kama unafanya biashara inayokuhitaji uwe makini kw akiasi gani, unahitaji muda wa kucheka. Unahitaji muda ambao unawez akufanya utani wa hapa na pale na ukafurahia na kucheka. Kuna faida kubwa sana kwenye kucheka, inakuongezea kujiamini na kinga ya mwili pia.
SOMA; Njia KUMI Za Kubana Matumizi Yako Mwaka Huu 2015.
5. Wasaidie wengine.
Utapata chochote unachotaka kwenye maisha kama utaweza kuwasaidia watu wengi zaidi kupata kile wanachotaka. Ifanye biashara yako kuwa sehemu ambayo watu wanajua matatizo yao yatapata suluhisho na utapata wateja wengi sana.
6. Kuwa na dhumuni la maisha yako.
Mbali na malengo na mipango ya kibiashara na hata maisha, kuwa na dhumuni kubwa la maisha yako. Hiki ni kitu ambacho utakiishi na ndio kitakusukuma wewe kuweka juhudi zaidi ili kuweza kufikia dhumuni hilo.
7. Kuwa tayari kubadilika.
Unachoamini leo, kesho kinaweza kisiwepo kabisa. Biashara inayolipa leo, miaka michache inaweza isiwepo kabisa. Hivyo wakati wowote kuwa tayari kubadilika. Soma alama za nyakati na kuwa tayari kuchukua hatua kabla mambo hayajakwenda hovyo.
8. Zungukwa na watu chanya.
Hakikisha unazungukwa na watu ambao wana mtizamo chanya kama ulivyo wewe. Hawa watakuwezesha wewe kuendelea na mtizamo wako. Ila kama utazungukwa na watu wenye mtizamo hasi, ni vigumu sana kuweza kuendelea na mtizamo wako.
SOMA; Hii Ni Kazi Yenye Malipo Makubwa Sana Ambayo Unaweza Kujifunza Kuifanya
9. Fanya kazi kwa juhudi na maarifa.
Hili ndio hitaji la msingi kabisa, maelezo yanajitosheleza. Kama haupo tayari kufanya kazi kwa bidii na maarifa, achana na biashara, kafanye vitu vingine, na sina wazo ni kitu gani hakihitaji kazi. Kama utakipata tushirikishe.
10. Acha kuwa mwathirika.
Kama unataka kukuza biashara yako unahitaji kuacha kuwa na mawazo ya kiathirika. Pale jambo lolote linapotokea, acha kufikiri kwamba kwa nini limetokea kwako, au kwamba una bahati mbaya. Badala yake chukua hatua ya kubadili mambo. Kama umefanya makosa jifunze na usirudie tena.
Mafanikio kwenye biashara sio kitu rahisi sana ila pale unapojipanga vizuri utaona yanakuja yenyewe bila ya wewe kuteseka sana. Fanya mambo yale ya msingi na jali sana biashara yako na wale wanaokuzunguka. Bila kusahau, jifunze sana, wekeza sana kwenye rasilimali muhimu kwako ambayo ni akili yako.
SOMA; Kurasa 365 Za Mwaka 2015, Fursa Muhimu Kwako Kujifunza.
Vitu VITATU Vinavyoathiri Kipato Chako Na Jinsi Ya Kukiongeza.
Katika mfumo wa uchumi tunaoishi sasa hivi duniani, ni dhahiri kwamba kipato chako kinaathiriwa na vitu vingi sana.
Kipato chako kinaweza kuathiriwa na hali ya uchumi inavyokwenda. Kwa mfano mfumuko wa bei unapokuwa mkubwa, kipato chako kinaweza kisitoshe matumizi yako. Lakini hii ni nguvu ya nje ambayo huwezi kuiathiri.
Kipato chako pia kinaathiriwa na mambo ambayo yanatokana na wewe binafsi na mambo haya unawezakuyabadili ili kubadili kipato chako.
Leo tutajadili vitu vitatu muhimu vinavyoathiri kipato chako na jinsi unavyoweza kuvitumia kubadili kipato chako.
Ni ukweli usiopingika kwamba kila mtu anapenda kipato chake kiongezeke, ila sasa unaanzia wapi kukiongeza? Jua vitu hivi vitatu na vifanyie kazi.
1. Unafanya nini.
Kitu cha kwanz akabisa kinachoathiri kipato chako ni unafanya kitu gani? Yaani ni shughuli gani unayofanya ili kujitengenezea kipato? Unafanya biashara? Umeajiriwa? Kama unafanya biashara je ni biashara gani? Na kama umeajiriwa je una utaalamu gani? Tunajua kabisa vipato vinatofautiana na kutokana na kile unachofanya. Kipato cha mwalimu hakiwezi kuwa sawa na cha daktari. Kipato cha boda boda hakiwezi kuwa sawa na cha dala dala.
Kuongeza kipato chako kwenye njia hii ni kuhakikisha unafanya kitu ambacho kina uwezekano mkubwa wa kutengeneza kipato kikubwa.
SOMA; HADITHI_FUNZO; Aliyenusurika Kufa Kutokana Na Tabia Yake Nzuri.
2. Unafanya kwa ubora gani?
Tumeona vipato vinatofautiana kutokana na vitu tofauti. Vile vile ndani ya fani moja au biashara moja, bado vipato havilingani. Watu wawili wanaweza wote kuwa walimu wenye kiwango sawa cha elimu lakini vipato vikawa tofauti. Watu wawili wanaweza kuwa wanaedesha boda boda na wanapaki eneo moja lakini vipato vikawa tofauti. Kwa yule ambaye anafanya kwa ubora wa hali ya juu kipato chake lazima kitakuwa kikubwa.
Hakikisha kile ambacho unakifanya unakifanya kwa ubora wa hali ya juu sana.
3. Ugumu wa kukubadili.
Kipato chako pia kinaathiriwa na ugumu wa kukubadili wewe kwenye hiko unachofanya. Pata picha wewe unafanya kazi ambayo ni wewe tu unaweza kuifanya, hii ina maana kwamba kama usipokuwepo kazi yako haiwezi kufanywa na mtu mwingine hivyo thamani ya kipato chako inakuwa kubwa. Hali kadhalika kama unafanya biashara kwa kiwango ambacho mteja wako hawezi kukipata sehemu nyingine, lazima utakuwa na kipato kikubwa.
Anza sasa kujitengenezea mazingira ya wewe kuw avigumu kubadilishwa. Na sio ufanye hivyo kwa kuwafanyia wengine majungu, ila kwa kujiboresha zaidi na hivyo kufanya kazi au biashara yako kwa ubora wa hali ya juu.
Chukua hatua leo ili kuboresha kipato chako, acha kulalamika, maamuzi ni yako.
SOMA; Kauli Mbili Za Kuacha Kutumia Leo, Maana Zinaashiria Kushindwa.
Okoa Muda Huu Muhimu Ambao Unaupoteza Kila Siku Na Kukuchelewesha Kufikia Mafanikio.
Kuna muda mwingi sana ambao unaupoteza kila siku na kwa kufanya hivyo unajichelewesha kufikia mafanikio.
Kumbuka muda una thamani kubwa kuliko fedha kwa sababu muda ukishapotea haurudi tena, ila ukipoteza fedha leo kesho unaweza kupata nyingine.
SOMA; UKURASA WA 09; MUDA–Kitu Chenye Thamani Kubwa Ila Kisichothaminika Na Wengi.
Muda huo unaopoteza ni ule unaotumia kusema mabaya ya wengine, au kuonesha mapungufu ya wengine.
Ni kweli kwamba wengine wanaweza kuwa wana mapungufu makubwa, wanaweza kuwa wanakosea sana ila wewe kutumia muda wako kuyasemea hayo hakutakusaidia kwa vyovyote kufikia mafanikio unayotarajia.
Kwa mfano wewe ni mfanya biashara na unatumia muda wako mwingi kusema jinsi gani wafanyabiashara wengine wanakosea, au wanamadhaifu. Kwa kufanya hivi hauna tofauti na wao. Ni heri kutumia muda wako mwingi kuimarisha biashara yako.
SOMA; Sheria NANE Za Kufanikiwa Kwenye Biashara Kutoka Kwa Warren Buffett.
Inawezekana wewe ni mchungaji ambae una kanisa, ila unatumia muda wako mwingi kusema jinsi gani wachungaji wengine wana mapungufu au wana mabaya. Ni vyema ukatumia muda huo vizuri kuwaonesha watu ni kipi sahihi kinachotakiwa kufanywa.
Inawezekana wewe ni mwanasiasa na unatumia muda mwingi kuonesha madhaifu ya chama kingine au mgombea mwingine. Hii haitakusaidia kushinda uchaguzi, ni vyema kutumia muda wako mwingi kuwaeleza watu utawafanyia nini na watakuona upo makini.
Sisemi tusikemee mabaya, ila hii isiwe agenda yetu kuu, labda kama ndio agenda yako na kama ndivyo hujui unachokifanya au itakuwa vigumu kifikia mafanikio.
Kumbuka kitu chochote ambacho hakipo kwenye malengo na mipango yako ni kelele kwako. Achana nacho mara moja na wekeza nguvu zako kwenye kukuza kile unachofanya.
SOMA; USHAURI ADIMU; Unapokutana Na Tatizo Jiulize Jambo Hili Moja La Msingi.
Wajasiriamali Wenye Mafanikio Hufanya Mambo Haya Matano Kila Siku.
Kila mtu ana maelezo yake ya mafanikio. Neno mafanikio lina maana tofauti kw akila mtu. Lakini licha ya utofauti huo bado kwa ujumla mafanikio ni kuwa bora kama unavyoweza kuwa.
Na mafanikio sio kitu ambacho kinatokea mara moja. Hutaamka siku moja asubuhi halafu paa mafanikio hao hapo.
SOMA; USHAURI; Jinsi Ya Kutoka Kimaisha Kwa Kuanza Na Mshahara Mdogo.
Mafanikio yanatokana na jinsi unavyoishi kila siku. Kuna tabia ndogo ndogo unazofanya kila siku ambazo zikikusanyika pamoja ndio zinaleta mafanikio au kushindwa.
Yafuatayo ni mambo matano ambayo wajasiriamali wenye mafanikio hufanya kila siku. Yasome na wewe uanze kuyafanya ili uweze kufikia mafanikio.
1. Wako tayari kujaribu tena hata pale wanaposhindwa.
Haijalishi wameshindwa mara ngapi, wajasiriamali wenye mafanikio huendelea kujaribu tena na tena. Na hawajaribu tu kama wajinga(kwa kurudia kile kile walichofanya) bali wanatumia walichojifunza na kubadili mbinu wanazotumia na hatimaye kupata mafanikio.
SOMA; NENO LA LEO; Hiki Ni Kitu Unachotakiwa Kufanya Kila Siku.
2. Huzikabili hofu zao.
Moja ya vitu vinavyowarudisha watu wengi nyuma ni hofu. Wajasiriamali wenye mafanikio sio kwamba hawana hofu, wanazo ila wanaamua kuzikabili. Wanaingiwa na hofu ila nwanajua hii ni hofu na wanaipuuza na kuendelea na mipango yao.
3. Wanajitengenezea nidhamu binafsi.
Wajasiriamali wenye mafanikio makubwa wanajua ya kwamba nidhamu binafsi ndio msingi wa mafanikio. Hivyo kila siku hujijengea nidhamu binafsi ili waweze kutekeleza majukumu yao, kuaminika zaidi na kuweza kufikia mafanikio. Wako tayari kufanya kazi ngumu leo ili baadae wapate matunda mazuri. Hawakimbilii kufanya vitu vya kuwafurahisha kwa sasa.
4. Hutenga muda wa kupumzika.
Pamoja na kupenda kufanya kazi kwa bidii na maarifa, wajasiriamali wenye mafanikio wanajua kwamba miili yao haiwezi kufanya kazi muda wote. Hivyo hutenga muda maalumu kwa ajili ya kupumzika ili kurejesha nguvu kwenye miili yao.
5. Hutoa bila ya kutegema kupokea.
Wajasiriamali wenye mafanikio hutoa kwa wengine bila ya kutegemea kupokea. Kama ni bidhaa au huduma wanatoa, hutoa zaidi ya wanavyolipwa.Kwa njia hii huendelea kuwa bora zaidi na kutengeneza wateja wengi, faida kubwa na mafanikio makubwa.
Hayo ndio mambo matano yanayofanywa na wajasiriamali waliofanikiwa, anza sasa kuyafanya na wewe kila siku. Kitakachotokea utaona mwenyewe.
Usianze Biashara Kama Hujui Kitu Hiki Kimoja.
Kama mwaka huu 2015 umepanga kuanza biashara usifanye kosa moja ambalo huwa linafanywa na wafanyabiashara wengi wanapoanza.
Usianze biashara kama hujui miaka mitano ijayo biashara yako itakuwa imefika wapi.
Ni muhimu sana kuwa na picha kubwa ya biashara yako ili unapoanza usisahau ulipotaka kufika.
Kama utaanza biashara ukiwa hujui miaka mitano utakuwa wapi hutafika popote. Maana biashara itakapoanza kukuchanganya utajikuta ukihangaika na matatizo yanayokusonga na kusahau kukuza biashara yako.
Pata picha ya kule unakokwenda kabla hata ya kuanza safari.
Hatua Tatu Za Kujua Kama Wazo Lako La Biashara Zuri.
Linapokuja swala la kufanya biashara watu wengi hupenda kutafuta ji wazo gani la biashara ni bora na linaweza kuwapatia faida.
Ukweli ni kwamba wazo moja la biashara haliwezi kuwa bora kwa watu wote. Wazo linaweza kuwa bora kwangu ila kwako likawa sio zuri au lisiweze kukuletea mafanikio.
Wazo bora la biashara linategemea na mtu anayetaka kufanya biashara yako.
Watanzania tumekuwa hatupendi kuumiza akili kutengeneza mawazo yetu ya biashara na hivyo kukimbilia kuiga, kitu ambacho kinatuumiza sana baadae.
Sasa leo hapa utajiongeza na hatua tatu za kutengeneza wazo lako la biashara ambalo litakuletea faida kubwa.
Wazo bora la biashara lina sifa hizi tatu;
1. Kitu unachopenda.
Hatua ya kwanza kabisa ya wazo bora la biashara ni kitu ambacho unapenda kufanya. Kama unapenda kitu unakuwa na shauku nacho na kupenda kukifuatilia zaidi.
2. Kitu ambacho upo tayari kukifanya.
Kupenda tu kitu hakutoshi, je upo tayari kukifanya? Je upo tayari kufanya kazi na kumwagika jasho? Je upo tayari kuvumilia hata pale mambo yatapokuwa magumu?
3. Kuleta thamani kwa wengine.
Sifa ya tatu ya wazo zuri la biashara ni kuwa thamani kwa wengine. Je watu wapo tayari kulipia bidhaa au huduma itakayotokana na wazo lako la biashara? Kama haliwezi kutengeneza thamani huna biashara.
Tumia njia hizi tatu kutengeneza wazo lako la biashara ambalo litakufikisha kwenye mafanikio.
Usiige tena, tumia akili yako, angalia mazingira yanayokuzunguka.
Tabia Mbaya KUMI(10) Zinazopunguza Ufanisi Wako.
Huenda unatamani kufanya zaidi ya unavyofanya sasa lakini kila ukijitahidi huoni mabadiliko. Huenda una ufanisi mdogo kiasi kwamba kila mtu anakuona wewe ni mvivu sana.
Sio kweli kwamba wewe ni mvivu bali kuna tabia ambazo zinakufanya ushindwe kutekeleza majukumu yako kwa wakati.
Leo utajiongeza na tabia kumi mbaya ambazo zinakufanya uwe na uzalishaji mdogo na ukiweza kuziepuka utaongeza uzalishaji wako.
1. Unzanza siku yako bila ya kuipangilia. Usipopangilia siku yako utafanya nini utajikuta unafanya chochote kinachotokea mbele yako.
2. Unaangalia facebook au email kila baada ya dakika kumi. Kama mawasiliano yako yanakufanya uwe na shauku kubwa ya kutaka kujua ni nini kinaendelea kwenye mitandao ya kijamii itakuwa vigumu sana kwako kukamilisha majukumu yako kwa wakati.
3. Unasubiri muda muafaka ndio ufanye ulichopanga kufanya. Kuna wakati unafikiri kama kitu fulani kikitokea basi nitafanya kitu fulani, mwishowe unaishia kutokufanya kabisa.
4. Unajaribu kufanya mambo mengi kwa wakati mmoja. Mwishowe unaishaia kushindwa kumaliza hata moja, kama mtu anayekimbiza sungura wawili, hakamati hata mmoja.
5. Unagoma kujifunza vitu vipya. Dunia ya sasa karibu kila kazi imerahisishwa sana. Kuna utaalamu mwingi ambao unaweza kuutumia kurahisisha kazi yako, ila unapogoma kujifunza unabaki nyuma.
6. Unasubiri mpaka dakika ya mwisho ndio ufanye jambo. Unapokuwa na muda wa kufanya jambo mara nyingi huwa unaona ni mwingi, ni mpaka muda unapokaribia kuisha unaona kwamba ulipoteza muda mwingi.
7. Unalaumu vifaa unavyofanyia kazi. Labda unasema kompyuta unayotumia ipo taratibu sana, mashine unayotumia inakurudisha nyuma. Hizi zote ni sababu ambazo hazina msingi.
8. Huna muda maalumu wa kula. Kama huna muda maalumu wa kula au wakati mwingine unaacha kula itakuwa vigumu sana kwako kuweza kuwa na nguvu ya kutekeleza majukumu yako.
9. Unatumia muda mwingi sana kupanga. Inawezekana unapanga, halafu unakaa unafikiria mipango yako, baadae unapanga tena. Kwa kupanga huwezi kutimiza chochote, unatakiwa kufanya kazi.
10. Huapati usingizi wa kutosha. Kama kila siku unachelewa kulala na kuamka umechoka ni vigumu sana kuweza kutekeleza majukumu yako.
Epuka tabia hizo kumi mwaka huu 2015 ili uweze kuongeza ufanisi wako.
